पुणे : पोलीसनामा ऑनलाईन – Pune Crime | पुणे आणि पिंपरी-चिंचवड परिसराला हादरवून टाकणाऱ्या विषारी दारूकांड प्रकरणामध्ये राज्य उत्पादन शुल्क विभाग आणि पोलिसांनी संयुक्तपणे मोठी कारवाई केली असून, यामुळे पुढील एक मोठा अनर्थ टळला आहे. या प्रकरणातील मृतांचा आकडा १९ वर पोहोचल्यामुळे प्रशासनाने अवैध दारू अड्ड्यांवर धाडी टाकण्यास सुरुवात केली होती.
या कारवाईदरम्यान तपास अधिकाऱ्यांनी ३५ लिटर क्षमतेचे एकूण १६ कॅन बेकायदेशीर दारू जप्त केली आहे, ज्यामध्ये तब्बल ५० लिटर अत्यंत घातक आणि विषारी मिथेनॉल केमिकल मिसळल्याचे समोर आले आहे. या १६ कॅनपैकी १२ कॅन पुण्याच्या वडारवाडी आणि गोखलेनगर परिसरातून, तर उर्वरित ४ कॅन पिंपरी-चिंचवडच्या फुगेवाडी भागातून जप्त करण्यात आले आहेत.
हा जप्त केलेला विषारी दारूचा साठा वेगवेगळ्या अवैध अड्ड्यांवरून थेट बाजारात विक्रीसाठी पाठवण्याची संपूर्ण तयारी झाली होती, परंतु प्रशासनाने वेळेत कारवाई केल्यामुळे हा साठा मद्यपींपर्यंत पोहोचू शकला नाही. जर हा साठा बाजारात विकला गेला असता, तर मृतांचा आकडा आणखी भयाण वाढून शेकडो नागरिकांचा जीव गेला असता, असा अंदाज तपास अधिकाऱ्यांनी व्यक्त केला आहे.
तपासादरम्यान समोर आले आहे की, आरोपींनी जास्त नफा कमावण्यासाठी आणि दारूची नशा वाढवण्यासाठी ऑनलाईन मागवलेले मिथेनॉल गावठी दारूमध्ये मिसळले होते. सध्या मुख्य सूत्रधार योगेश वानखेडे याच्यासह अनेक आरोपींना पोलिसांनी बेड्या ठोकल्या असून, जप्त करण्यात आलेली दारू ही थेट मृत्यूचे कारण बनणारे ‘केमिकल कॉकटेल’ असल्याचे स्पष्ट झाले आहे.
